विपिनको मृत्यु पुष्टि भएपछि खाली हात स्वदेश फर्किए आमा र बहिनी

काठमाण्डौँ । हमासको कब्जामा रहेका नेपाली युवा विपिन जोशीको निधन पुष्टि भएपछि उनलाई खोज्दै अमेरिका पुगेका उनकी आमा र बहिनी आज बिहान स्वदेश फर्किएका छन् । विपिनको सकुशल उद्धारको आशामा अमेरिका गएका परिवारका सदस्यहरू उनलाई जिवितै फर्काउने अपेक्षा राखेका थिए । तर, इजरायल–हमास युद्धका क्रममा हराएका विपिनको मृत्यु पुष्टि भएपछि उनीहरू खाली हात फर्कनुपरेको हो ।

कतार एयरवेजको विमानमार्फत उनीहरू आज बिहान काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेका छन्। विमानस्थलमा पारिवारिक सदस्यहरू तथा आफन्तहरूले उनीहरूलाई भावुक रूपमा स्वागत गरेका थिए ।

२०७८ सालमा इजरायल पुगेका २२ वर्षीय विपिन जोशी गत वर्ष अक्टोबरमा हमासको आक्रमणमा परेपछि बेपत्ता भएका थिए । उनीसँगै अन्य केही नेपाली विद्यार्थीहरू पनि सो आक्रमणमा मारिएका थिए । सरकारले विपिनको मृत्यु पुष्टि गरे पनि उनको शव फेला परेको छैन । शव ल्याउने वा अन्तिम श्रद्धाञ्जली दिन नपाएका परिवार अझै पनि मर्माहत छन् ।