मिडियाबाजी डटकम काठमाडौँ,भाद्र १३ । प्रधानमन्त्री केपी शर्मा ओलीले शाङ्घाई सहयोग संगठन (एससीओ) को शिखर सम्मेलनमा सहभागी हुन चीन जाँदै गरेको बताएका छन् ।
आज (शुक्रबार) प्रतिनिधिसभालाई सम्बोधन गर्दै उनले भ्रमण नेपालका लागि महत्वपूर्ण अवसर भएको बताए ।
ओलीले एससीओ २००१ मा स्थापना भएको संगठन भएको स्मरण गराउँदै नेपाल सन् २०१६ देखि यस संगठनको संवाद साझेदारको रूपमा संलग्न रहँदै आएको जानकारी दिए। उनले यस पटकको सम्मेलनमा नेपालको स्पष्ट दृष्टिकोण प्रस्तुत गर्ने र राष्ट्रिय हितलाई प्रवर्द्धन गर्ने आफ्नो उद्देश्य रहेको प्रष्ट पारे ।
समसामयिक क्षेत्रीय र अन्तर्राष्ट्रिय मामिलामा नेपालले सधैं शान्ति, आपसी सहयोग र स्थायित्वमा जोड दिएको उल्लेख गर्दै ओलीले यही आधारमा आफ्नो धारणा प्रस्तुत गर्ने बताए । उनले चीनका राष्ट्रपति सी चिनफिङसँग उच्चस्तरीय भेटवार्ता हुने जानकारी दिँदै यसले दुई मुलुकबीचको आपसी विश्वास र सहकार्यलाई थप मजबुत पार्ने अपेक्षा गरिएको बताए ।
