मिडियाबाजी डटकम काठमाडौँ,भाद्र ६ । सत्ता साझेदार नेपाली कांग्रेस महामन्त्री गगन थापाले संघीयताको सबैभन्दा ठूलो समस्या प्रदेश नभई संघ रहेको बताएका छन् ।
आज (शुक्रबार) काठमाडौंमा आयोजित एक कार्यक्रमलाई सम्बोधन गर्दै देश संघीयतामा गइसकेपछि पनि संघ सरकार संघीयतामा जान नसकेको बताए ।
‘जिल्ला समन्वय समिति खारेज गर्न आवाज उठेको छ । संघीयताको सबैभन्दा ठूलो समस्या भनेको प्रदेश होइन, संघ हो । संघीयतामा हामी गइसक्यौँ तर संघ नै संघीयतामा आउन सकेको छैन । सेन्टर नै संघीयतामा गएको छैन,’ उनले भने ।
उनले कांग्रेस र नेकपा एमालेले सरकार बनाउँदै गर्दा संविधान संशोधन गर्ने कुरा पहिलो प्राथमिकतामा परेको उल्लेख गर्दै अब संख्या वा अन्य कुनै बहानामा पनि पछि हट्न नहुने बताए । उनले ठूला शक्तिहरूले जोखिम उठाउनसक्नु पर्ने बताए ।
‘संविधान संशोधनमा यो त्यो, संख्या भन्नै पाइँदैन । जोखिम छ, जोखिम उठाउनु पर्छ । मुख्य शक्तिले जोखिम उठाउनु पर्छ । कांग्रेस र एमालेको अहिलेको सरकारले बनाउने बेलामा दुई वटा पार्टीले म संविधानको संशोधनको आवश्यकता महसुस गरेका छौँ, हामी गर्छौं भनेर आइसकेपछि यो बहस अघि बढाउनै पर्छ,’ उनले भने ।
महामन्त्री थापाले संसद् समावेशी बनाउने र पाँच वर्ष एउटै राजनीतिक दलले देशको नेतृत्व गर्ने अवस्था सिर्जना गर्नेगरी छलफल अघि बढाउन जरुरी रहेको बताएका छन् । न्यायपालिकाको बारेमा पनि छलफल गर्न जरुरी रहेको पनि उनको भनाइ छ ।
