मिडियाबाजी डटकम काठमाडौँ, साउन ३१ । भैरहवा कारागारबाट काठमाडौं ल्याइएका राष्ट्रिय स्वतन्त्र पार्टी (रास्वपा) सभापति रवि लामिछानेलाई त्रिभुवन अन्तर्राष्ट्रिय विमानस्थलबाट नेपाल आयल निगमको बाटो हुँदै निकालिएको छ ।
रविलाई ल्याउने भनेपछि रास्वपाका नेता–कार्यकर्ता विमानस्थलमा भेला भएका थिए । तर, रविलाई लुकाएर अर्को बाटो लगिएको छ । लामिछानेलाई स्वागत गर्नको लागि विमानस्थलमा पत्नी निकितासहित समर्थकहरू पुगेका थिए । अब उनलाई सिधै नख्खु कारागार, ललितपुर लगिनेछ । त्यहाँ पनि बाल्लो भिड जम्मा भइसकेको छ ।
आज (शनिबार) बुद्ध एयरको विमानबाट उनलाई भैरहवाबाट काठमाडौं ल्याइएको हो । बुटवलको सुप्रिम सहकारीको बचत अपचलन मुद्दामा पूर्व गृहमन्त्री समेत रहेका लामिछाने गएको चैत २५ गते जिल्ला कारागार रुपन्देहीमा पुर्पक्षका लागि जेल चलान भएका थिए ।
उनी उच्च अदालत तुलसीपुरको, बुटवल इजलासको आदेशले कारागार चलान भएका थिए । लामिछानेले आफूलाई १२६ दिनसम्म सहयोग गर्ने भैरहवाका जनता, सुरक्षाकर्मी र कारागार प्रशासनप्रति आभार व्यक्त गरेका छन् ।
