मिडियाबाजी डटकम काठमाडौँ, साउन ६ । नेपाली कांग्रेसका महामन्त्री विश्व प्रकाश शर्माले गठबन्धन सरकारको सफलता फरक मतहरुको बीचमा साझा मतबाट बन्ने बताएका छन्।
मंगलबार काठमाडौंमा आयोजित ४३औं वीपी कोइराला स्मृति दिवसको अवसरमा आयोजित कार्यक्रममा उनले एउटै दलभित्र दुई तीनवटा विचारहरु हुन्छन् भने दुइवटा पृष्ठभूमिबाट आएका पार्टीबीच फरक विचार हुनु स्वभाविक भएको भन्दै नेपाली कांग्रेस र नेकपा एमाले फरक मतको बीचमा साझा मतको खोजी गर्नुपर्ने बताए।
उनले भने, ‘अहिले परिस्थितिको जटिलताको बीचबाट एउटा गठबन्धनको सरकार बनेको छ। यो सरकारको सफलता फरक मतहरुको बीचको साझा मतबाट बन्ने हो। एउटै दलभित्र पनि दुई तीनवटा विचारहरु हुन्छन् भने स्वभाविक कुरा हो दुईवटा पृष्ठभूमिबाट आएका नेपाली काङ्ग्रेस र नेकपा एमालेको बीचमा प्रतिस्पर्धा पनि छ, सहकार्य पनि छ, फरक मत पनि छ र यसको बीचमा साझा मतको खोजी गर्नुछ।’
यस्तै, उनले अहिले दुई पार्टीबीच उत्पन्न हुँदै गरेका समस्या दुईवटा कुराको सन्दर्भमा प्रधानमन्त्रीले गम्भीर हुनुपर्ने बताए।
उनले भने, ‘अहिले हाम्रो बीचमा उत्पन्न हुँदै गरेका समस्या दुईवटा कुराको सन्दर्भमा छ। यो दुइवटै कुराको हल हाम्रो आग्रहलाई केन्द्रमा राखेर प्रधानमन्त्रीले गम्भीरता राख्नुपर्छ। एउटा कुलिङ पिरियडको जुन विषय थियो यसमा जो दोषि छ त्यसलाई कारबाही गर्नुपर्छ।’
साथै, भूमि विधेयकको सन्दर्भमा अलि बढि हतार गर्न खोजिएको र प्रधानमन्त्रीको पनि समर्थन रहेको हो कि भन्ने खालका बुझाइलाई पनि प्रधानमन्त्रीले गम्भीरतापूर्वक लिनुपर्ने उनको भनाइ छ।
