मिडियाबाजी डटकम काठमाडौं,आश्विन २२। संविधधान दिवसका दिन कैदीबन्दीलाई दिइएको आम माफीको विरोधमा मानव अधिकारवादीले राष्ट्रपति कार्यालय शीतल निवास अगाडि प्रदर्शन गरेका छन् । मानव अधिकार तथा शान्ति समाजको अगुवाइमा आज राष्ट्पति कार्यालय अगाडि विरोध प्रदर्शन गरेका हुन् ।
मानव अधिकारवादी समूहको उक्त विरोध प्रदर्शनमा प्रहरीले हस्तक्षेप गरेको छ । प्रदर्शनमा सहभागीहरूले निषेधित क्षेत्र तोडेपछि मानव अधिकारवादी समूहका अगुवा कृष्ण पहाडीसहित १३ जनालाई प्रहरीले नियन्त्रणमा लिएको छ । प्रदर्शनकारीहरु आक्रोशित हुँदै निषेधित क्षेत्र तोडेपछि नियन्त्रणमा लिइएको प्रहरीले जनाएको छ ।
असोज २१ गतेदेखि कैद माफी लगायत विभिन्न १० बुँदे माग राख्दै समाजले आन्दोलन गर्दै आइरहेको छ । प्रदर्शनमा नागरिक अगुवा र अधिकारकर्मीहरूको सहभागिता रहेको थियो । संविधान दिवसका अवसरमा सरकारको सिफारिसमा राष्ट्रपतिले हत्या अभियोगमा आजीवन जेल सजाय पाएका ‘रिगल’ भनिने योगराज ढकाल लगायतलाई दिएका सजाय माफीको विषय निकै विवादित बनिरहेको छ ।
