मिडियाबाजी डटकम काठमाडौं : भारतीय रुपैयाँ (भारु) इतिहासकै न्यून विन्दुमा पुगेको छ । मंगलबारको कारोबारमा भारु मनोवैज्ञानिकरुपमा महत्वपूर्ण मानिएको ८० रुपैयाँको विन्दुभन्दा कमजोर भएको हो । मंगलबारको कारोबारमा भारु प्रतिडलर ८०.०१७५ रुपैयाँमा बन्द भएको छ । यस दिन भारु प्रतिडलर ८०.०५ विन्दुसम्म पुगेको थियो । सन् २०२२ सुरु भएयता भारु डलरको तुलनामा ७% ले कमजोर भएको छ ।
अन्तर्राष्ट्रिय बजारमा बलियो बनेको डलर र भारतको कमजोर घरेलु आर्थिक सूचकका कारण भारु पछिल्लो समय निरन्तर कमजोर बन्दै गएको छ । विश्व बजारमा कच्चा तेलको भाउमा उच्च वृद्धि भएसँगै भारतको व्यापार घाटा र चालु खाताको घाटा पनि फराकिलो बन्दै गएको छ । यस्तै, विदेशी लगानीकर्ताहरुले सम्पति फिर्ता लैजाने क्रम बढेका कारण पनि भारतीय रुपैयाँमा दबाब सिर्जना भएको छ हो ।
