राइड सेयरिङ प्लाटफर्मको नाममा विदेशी कम्पनी इन–ड्राइभरले हाकाहाकी अवैध व्यापार चम्काइ रहेको छ । विश्वका ४२ वटा भन्दा बढी देशमा सञ्चालनमा रहेको भनिएको राइड सेयरिङ अर्थात् राइड हेलिङ कम्पनी इन–ड्राइभरले नेपालमा भने बिना दर्ता, बिना अनुमति खुलेआम राइड सेयरिक सेवा सञ्चालन गरिरहेको पाइएको हो ।हुन त नेपालमा हालसम्म राइड सेयरिङ कम्पनीहरुलाई आधिकारिक रूपमा यातायात ऐन बमोजिम सञ्चालनको सुविधा छैन । तथापि, ऐनको अभावमा यस्ता कम्पनीहरू रजिष्ट्रारको कार्यालयमा दर्ता भएर सञ्चालन हुन पाउने सुविधा छ । तर, इन–ड्राइभर भने कम्पनीले भने हालसम्म कुनै कम्पनीको नाममा पनि दर्ता नभई खुलेआम सेयर राइडिङ सेवा सञ्चालन गरिरहेको पाइएको छ ।
इन–ड्राइभर कम्पनी हालसम्म कम्पनी रजिष्ट्रारको कार्यालयमा पनि दर्ता नभएको र विदेशी लगानी ल्याउन लगानी बोर्डसँग समेत कुनै स्वीकृति नलिएको जानकारी प्राप्त भएको छ । लगानी बोर्डका प्रवक्ता अमृत लम्सालले इन–ड्राइभरको नाममा अहिलेसम्म कुनै विदेशी लगानी स्वीकृत नभएको र स्वीकृतिका लागि माग समेत नभएको बताए ।‘इन–ड्राइभरको नाममा अहिलेसम्म बोर्डमार्फत कुनै विदेशी लगानी स्वीकृत भएको छैन, र माग पनि भएको छैन । यो कस्तो कम्पनी हो र नेपालमा आउन चाहेको हो वा होइन, त्यो पनि बोर्डलाई जानकारीमा छैन,’ प्रवक्ता लम्सालले भने ।
सन् २०१३ देखि नै सञ्चालनमा रहेको भनिएको अन्तर्राष्ट्रिय कम्पनी इन–ड्राइभर नेपालमा कहिलेदेखि सञ्चालनमा आयो र यसको केन्द्रीय कार्यालय कहाँ छ ? सम्पर्क व्यक्ति को हो ? कसैलाई जानकारीमा छैन । तर, इन–ड्राइभरको नाममा व्यापार भने भइरहेकै छ । जानकारहरूका अनुसार यस कम्पनीले छिमेकी राष्ट्र भारतमार्फत नेपालमा अवैध राइड सेयरिङ व्यवसाय चलाइरहेको छ । तर, यता सरकारलाई भने यस बारे कुनै पत्तो नै छैन ।
– रातोपाटी डटकमबाट
