मिडियाबाजी डटकम काठमाडौँ,भाद्र १५ । नेकपा एकीकृत समाजवादीको झलनाथ खनाल–घनश्याम भुसाल पक्षीय नेताहरूको छुट्टै बैठक सुरु भएको छ ।
नयाँ बानेश्वरस्थित बानेश्वर क्याम्पसमा उनीहरुको छलफल सुुरु भएको हो । पार्टीको आगामी केन्द्रीय कमिटी, स्थायी कमिटी लगायतका बैठकहरूको एजेण्डा तय गर्न नेताहरू छलफलमा जुटेका हुन् ।
भेला पूर्वमन्त्री तथा पार्टीका पूर्वसचिव जीवनराम श्रेष्ठको अगुवाईमा भएको बताइएको छ । उक्त भेलामा उपाध्यक्ष जयन्ती राई, उपमहासचिव गरिमा शाह, पूर्वमन्त्री तथा स्थायी कमिटी सदस्य हरि पराजुली, पोलिटब्यूरो सदस्य तथा बागमती प्रदेशका पूर्वमन्त्री लक्ष्मण लम्साल, युवा संघका पूर्व अध्यक्ष तथा पोलिट्व्युरो सदस्य नरेशकुमार शाही, केन्द्रीय सदस्य सुशील भट्टराई, केन्द्रीय सदस्य मनाकुमारी साउदलगायतको उपस्थिति छ ।
बैठकमा डा.बिजय पौडेल, केदार सञ्जेल, धर्मराज निरौला, हिरेन्द्र शाहीलगायत सहभागी छन् । बैठकमा सहभागी नेताहरूले यो छलफललाई अनौपचारिक भनेका छन् । पछिल्लो समय अध्यक्ष माधवकुमार नेपाल र सम्मानित नेता झलनाथ खनालबीच असमझदारी बढेको छ । पछिल्ला दिनमा उनीहरू सार्वजनिक रुपमै एक अर्काका अभिव्यक्तिको खण्डन गरिरहेका छन् ।
