मिडियाबाजी डटकम काठमाडौँ,भाद्र १५ । युक्रेनका पूर्व सभामुख आन्द्रिय भोलोदिमिरोभिच परूबियको गोली हानी हत्या भएको छ ।
युक्रेनको पश्चिमी सहर लिविभमा शनिबार मध्याह्न पूर्व सभामुखमाथि एक संदिग्धले अन्धाधुन्ध गोली चलाएर उनको हत्या गरेको हो ।
गोली प्रहार गरी हत्यारा फरार भएका थिए । परूबीयमाथि धेरै गोली प्रहार भएको थियो । गोली प्रहारबाट ५४ वर्षीया परूबीयको घटनास्थलमै मृत्यु भएको युक्रेनी प्रहरीलाई उद्धृत गर्दै अन्तर्राष्ट्रिय समाचार संस्था रोयटर्सले लेखेको छ ।
गोली प्रहार गर्ने व्यक्तिको खोजीका लागि प्रहरी परिचालन गरिएको छ । परुबीय युक्रेनी संसदका सक्रिय सदस्य थिए । उनी सन् २०१६ अप्रिलदेखि २०१९ अगस्टसम्म सभामुख थिए ।
सन् २०१४ को सुरुवातमा पूर्वी युक्रेनमा युद्ध सुरु हुँदा र रूसले क्राइमिया कब्जा गर्दा उनी राष्ट्रिय सुरक्षा तथा रक्षा परिषद् (एनएसडिसी) का सचिव समेत थिए । उनी सन् १९९१ मा स्थापना भएको सोसल नेशनल पार्टीका सह–संस्थापक पनि थिए ।
