मिडियाबाजी डटकम काठमाडौँ,भाद्र १५ । चीनको पाँच दिने भ्रमणमा रहेका प्रधानमन्त्री केपी शर्मा ओलीको भारतीय प्रधानमन्त्री नरेन्द्र मोदीसँग भेट नहुने भएको छ ।
चिनियाँ राष्ट्रपति सी चिनफिङसँग शनिबार भेटवार्ता गरेका प्रधानमन्त्री ओलीको मोदीसँग भेटको कार्यक्रम नरहेको प्रधानमन्त्रीको सचिवालयले जनाएको छ । भ्रमण टोलीमा रहेका पत्रकार प्रकाश सिलवालले मोदीसँग भेटवार्ताको कार्यतालिका नरहेको जानकारी दिएका छन् ।
‘भारत भ्रमण तय भइसकेको अवस्थामा भारतका प्रधानमन्त्री मोदीसँग प्रधानमन्त्रीको भेटवार्ताको कार्यक्रम चीनमा छैन्, सिलवालले सुनाए । शनिबार चिनियाँ राष्ट्रपति सीसँगको द्वीपक्षीय भेटका क्रममा प्रम ओलीले भारत–चीनबीच लिपुलेकलाई व्यापारिक मार्गका रूपमा प्रयोग गर्ने सहमतिमा नेपालको आपत्ति प्रकट गरेका थिए ।
भारतीय प्रम मोदीसँग भेटवार्ता भएको अवस्थामा ओलीले सो विषय उठाउने अपेक्षा गरिएको थियो । सांघाइ कोअपरेसन अर्गनाइजेसनको २५औं शिखर सम्मेलनका लागि प्रधानमन्त्री ओली शनिबार चीन पुगेका हुन् ।
नेपालका प्रधानमन्त्री केपी शर्मा ओलीपछि चीनका राष्ट्रपति सी चिनफिङसँग भारतका प्रधानमन्त्री नरेन्द्र मोदीले भेटवार्ता गर्दैछन् । यसैबीच अब चीनका राष्ट्रपति सीसँग भारतका प्रधानमन्त्री मोदीले आज भेटवार्ता गर्ने भारतीय सञ्चारमाध्यमले उल्लेख गरेका छन् ।
यसअघि मोदीले २०१८ मा चीनको भ्रमण गरेका थिए । जुन २०२० मा भएको गलवान झडपयता मोदी पहिलो पटक चीन गएका हुन् । यस भ्रमणको उद्देश्य दुई देशबीचको सीमा विवाद कम गर्नु पनि रहेको बताइएको छ । चीनको तियानजिन सहरमा आयोजना हुने सांघाई सहयोग संगठन (एससीओ) शिखर सम्मेलनका लागि नेपाल र भारतसहित २० भन्दा बढी देश सहभागी हुँदैछन् ।
