मिडियाबाजी डटकम काठमाडौँ,भाद्र १४ । नेकपा एकीकृत समाजवादीका अध्यक्ष माधवकुमार नेपालले एमालेबाट विद्रोह नगरेको भए अहिले आफूहरुको कन्तबिजोग हुने बताएका छन् ।
समाजवादी प्रेस संगठनको बैठकलाई सम्बोधन गर्दै उनले एमालेबाट विद्रोह नगरेको भए अहिले कन्तबिजोग हुने बताए ।
उनले एमालेबाट विद्रोह गर्ने बेलामा सबैले साथ नदिए पनि पार्टी निर्माण गरेको बताए । एमाले फुटाएर आफूहरूले जायज काम गरेको नेपालको भनाई छ । उनले भने, ‘हामीले आँट नगरेको भए, त्यो बेलामा विद्रोहको आँट नगरेको भए हाम्रो कन्तबिजोक हुन्थ्यो, विद्रोहको औचित्य के छ भन्नेहरूको दुई कौडीको पनि महत्व छैन, कुनै अर्थ छैन ।’
उनले सबै मिलेर मेहनत गरे पार्टी पहिलो शक्तिको रुपमा स्थापित हुने दाबी गरे । ‘०८४ को चुनाव आउँदै छ, हामी अहिलेदेखि नै तयारीमा जुट्नु पर्छ । साथीहरूले मेहनत गरेर वडा, स्थानीय तह, प्रदेशमा अरू पार्टीलाई एक्लै पराजित गरेका पनि छन् ।’
उनले भने, ‘कर्णाली प्रदेशमा बडो शान बनिरहेको छ । हामीले विश्वास गरेको शक्तिलाई साथमा लिन सक्यौं भने सुदूरपश्चिममा पनि त्यस्तै छ, हामीसँग पहिलो नम्बरको शक्ति छ, हामीसँग मन र भावना मिलेकाहरूसँग सँगै जान्छन् भने पहिलो शक्तिको रूपमा हाम्रो पार्टीलाई स्थापित गर्न सक्छौँ । मधेश प्रदेशले पनि त्यही भन्दैछ । पहिले जस्तो होइन ।’
नेपालले आफू कुनै पार्टीसँग विलीन नहुने प्रष्ट पारेका छन् । ‘हामी सबैसँग संवाद गरिरहेका छौं । जोसँग विचार, सिद्धान्त र नीति मिल्छ, त्यसपछि मात्रै पार्टी मिल्छ, जोसँग मन मिल्छ, दिल मिल्छ, विश्वास हुन्छ व्यवस्थापन पनि मिलेपछि पार्टी पनि मिल्छ । समाजवादी मोर्चालाई विस्तार गरेपछि कम्युनिष्ट पार्टीहरु÷वामपन्थी एकतालाई अगाडि बढाउने काम गर्छौं ।’
अध्यक्ष नेपालले पतञ्जली जग्गा प्रकरणमा आफूमाथि बिना कारण मुद्दा लगाइएको आरोप लगाएका छन् । पूर्व प्रधानमन्त्री नेपालले हदबन्दी भन्दा बढी जग्गा दिने काम गरेर र दिएको भन्दा बढी जग्गा विक्री गर्न दिने काम गरेर बेठिक गरेको भन्दै मुद्दा लगाइएको बताए ।
‘अहिले ममाथि एउटा मुद्दा चलाइएको छ, मुद्दा के छ त्यहाँ मुद्दामा ४ वटा कुरा छ । हदबन्दी भन्दा बढी जग्गा दिने काम गरेर र दिएको भन्दा बढी जग्गा बिक्री गर्न दिने काम गरेर बेठीक भयो भन्नेछ ।’
नेपालले भने, ‘सरकारी र सार्वजनिक सम्पत्ति हिनामिना र हानी नोक्सानी गर्ने काम भयो, यसरी हिनामिना र हानी नोक्सानी गरेर भ्रष्टाचारको काम भयो । हदबन्दी भन्दा बढी जग्गा बिक्री गर्न दिन पाइन्छ की पाइँदैन, कानूनले के भन्छ ? हदबन्दी छुटलाई नियमन गर्ने सम्बन्धी विशेष व्यवस्था रहेको छ । कसैले स्वीकृति नलिइकन किनेको रहेछ भने पनि नियमन गर्न सकिन्छ । नेपाल सरकारले सूचित आदेश बमोजिम हदबन्दीको जग्गा राख्न दिन स्वीकृति दिन सक्नेछ ।’
