मिडियाबाजी डटकम काठमाडौँ,भाद्र १३ । प्रधानमन्त्री केपी शर्मा ओलीले आज प्रतिनिधिसभा वैठकमा आफ्नो चीन भ्रमणबारे १० बुुँदामा जानकारी गराएका छन् ।
प्रधानमन्त्री ओलीले प्रतिनिधिसभाको बैठकमा आफ्नो चीन भ्रमणका क्रममा चीनका राष्ट्रपति सी चिनफिङसँगको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गर्दै भदौ १४ गतेदेखि १८ गतेसम्म ५ दिने भ्रमणमा जान लागेको जानकारी गराए ।
भ्रमण नेपालको हित र प्रतिष्ठालाई माथि उठाउने गरी हुने पनि बताएका छन् । ‘नेपालको हित र प्रतिष्ठालाई माथि उठाउने गरी मेरो नेतृत्वमा गएको प्रतिनिधिमण्डलले काम गर्नेछ । त्यसमा विश्वस्त रहन आग्रह गर्छु’ उनले भने ।
भ्रमणको मूल उद्देश्य चीनको थियानजिन शहरमा आयोजना हुने सांघाई सहयोग संगठन (सांघाई कोअपरेशन अर्गनाइजेशन) को शिखर सम्मेलनमा भाग लिनु रहेको ओलीको भनाइ छ । तर, ओलीले भ्रमणमा चीन र भारतले नेपाली भूमि लिपुलेकबारे गरेको सम्झौताबारे कुरा राख्नेबारे कुनै जानकारी गराएनन् ।
यही भदौ ३ गते मंगलबार चीन र भारतले नेपाललाई बाइपास गरेर लिपुलेक नाका प्रयोग गर्ने सहमति पुनः गरिसकेका छन् । चिनियाँ विदेशमन्त्री वाङ यीको भारत भ्रमणका क्रममा लिपुलेकसहित तीन व्यापारिक नाका खोल्ने सहमति दुई देशबीच भएको हो ।
भारतीय राष्ट्रिय सुरक्षा सल्लाहकार एवं चीन–भारत सीमा वार्ताका विशेष प्रतिनिधि अजित डोभलको निमन्त्रणामा चिनियाँ समकक्षी वाङ दिल्ली पुगेका थिए । दुई देशका प्रतिनिधिबीच भएको छलफलपछि भारतको विदेश मन्त्रालयले १२ बुँदे संयुक्त विज्ञप्ति जारी गर्दै लिपुलेक प्रयोगबारे जानकारी गराएको थियो ।
मोदीसँगको भेटबारे अझै छैन टुंगो
प्रधानमन्त्री केपी शर्मा ओलीले आफ्नो चीन भ्रमणबारे सदनलाई जानकारी गराएका छन् । आज (शुक्रबार) को प्रतिनिधिसभा बैठकमा ओलीले भदौ १४ गतेदेखि १८ गतेसम्म चीन भ्रमण हुने जानकारी गराएका हुन् ।
उनले भ्रमणका क्रममा चीनियाँ राष्ट्रपति सी चीनफिङ, रुसी राष्ट्रपति भ्लादिमीर पुटिनसहित विभिन्न देशका प्रमुखसँग भेटवार्ता तय भएको जानकारी गराएका छन् । ‘हालसम्म रूसी महासंघका महामहिम राष्ट्रपति भ्लादिमीर पुटिन, गणतन्त्र माल्दिभ्सका महामहिम राष्ट्रपति डा मोहमद मिज्जु, कम्बोडिया अधिराज्यका महामहिम प्रधानमन्त्री डा सोमदेक मोहा बोरभोर तिपाहदे हुन महानेट, लाओ जनप्रजातान्त्रिक गणतन्त्रका महामहिम प्रधानमन्त्री सोनेसाइ सिपानडोन तथा समाजवादी गणतन्त्र भियतनामका महामहिम प्रधानमन्त्री फाम मिन चिङसँग छुट्टाछुट्टै भेटवार्ता तय भइसकेको छ’ उनले भने । तर, भारतीय प्रधानमन्त्री नरेन्द्र मोदीसँग भारतमै भेट हुने भनेर चर्चा भए पनि उनले यसबारे सदनलाई कुनै जानकारी दिएनन् ।
