मिडियाबाजी डटकम काठमाडौँ, साउन २१ । राष्ट्रिय स्वतन्त्र पार्टी (रास्वपा) ले ‘कुलिङ अफ पिरियड’ मा छेडखानीसम्बन्धी प्रकरणमा राज्य व्यवस्था समितिका सभापति रामहरी खतिवडाले राजीनामा दिनुपर्ने निष्कर्ष निकालेको छ।
हिजो बसेको सचिवालय बैठकले सो निष्कर्ष निकालेको प्रवक्ता मनिष झाले जानकारी दिए ।
निजामती सेवा विधेयकको मस्यौदामा छेडखानी गर्दै कुलिङ अफ पिरियडलाई निष्प्रभावी बनाइएको सम्बन्धी विवादमा छानबिनका लागि बनाइएको संसदीय समितिले हिजो प्रतिवेदन बुझाएको थियो। उक्त प्रतिवेदनले समितिका सभापति रामहरि खतिवडालाई नैतिक जिम्मेवार ठहर्याएको छ । उनले आवश्यक समन्वय गर्न नसकेको प्रतिवेदनमा उल्लेख छ । यसैमा टेकेर रास्वपाले खतिवडाको राजीनामा मागेको हो ।
‘कुलिङ अफ पिरियड’ मा गरिएको गडबडीप्रति क्षमा याचना गर्दै सभापति खतिवडाले राजीनामा दिँदा उपयुक्त हुन्छ,’ बैठकका निर्णयबारे जानकारी दिँदै झाले भने, ‘संसदीय छानविन समितिबाट जुन प्रतिवेदन आएको छ, त्यसले सभापति खतिवडामा नैतिक पतन र नालायकीपना दुवै देखाएको छ । उहाँमा अब सभापतिमा रहने नैतिक अधिकार रहेन ।’
हिजोको बैठकमा रास्वपाभित्र पनि उच्चपदस्थ सरकारी कर्मचारीहरूलाई कुलिङ पिरिड लगाउने प्रस्ताव गरिएको छ । सरकारी सेवाबाट निवृत्त भएको २ वर्षसम्म पार्टी सदस्य नबनाउने गरी विधानमा संसोधन गर्न प्रस्ताव आएको प्रवक्ता झाले जानकारी दिए ।
